Jez Nelson & Chris Philips

Крис Филипс и Џез Нелсон се коосновачи на One Jazz – дигитална радио-платформа посветена на промовирање на џез-музиката, која ги обединува легендарните радио-водители со цел да создадат нов простор за глобалната џез-заедница.

Џез Нелсон го позајмил албумот „Head Hunters“ на Херби Хенкок од библиотеката во Бромли кога имал 14 години и оттогаш сè се промени. На радио е од раните 1980-ти, најпрво на пиратските станици „Хорајзон“ (Horizon) и „Солар“ (Solar), а потоа и на џез-станицата „К-Џез“ (K-Jazz), која ја основал со Крис Филипс и Жил Питерсон во 1985 година. По периодот како радионовинар, бил дел од првиот тим водители на британското „Џез ФМ“ радио. Потоа станал водител на „Би-Би-Си Радио 5“, „Би-Би-Си Радио 4“ и, во текот на 20 години, домаќин на водечката џез-емисија „Jazz on 3“ на „Би-Би-Си Радио 3“. Работел и на телевизија, патувајќи низ светот како водител на „Tomorrow’s World“. Во 1991 година ја основал продукциската компанија „Somethin’ Else“, со која раководел сè до неодамна. „Somethin’ Else“ стана дел од „Sony Music Entertainment“ во 2021 година. Џез има продуцирано илјадници радио и ТВ-програми, вклучувајќи документарци за Сан Ра, Гил Скот-Херон, Роберт Вајат и британската џез-сцена. Во 2020 година му беше доделена титулата Член на Редот на Британската Империја (MBE) за заслуги во радиото. Џез исто така е активен промотор на џез во живо, особено како коосновач на „Jazz In The Round“ заедно со театарот „Кокпит“ (The Cockpit Theatre) во Лондон. До ден-денес ја води својата емисија „Somethin’ Else“ на британското „Џез ФМ“ радио и неодамна ја кооснова „Уан Џез“ (One Jazz) заедно со својот долгогодишен пријател Крис Филипс. Сè уште го обожава Херби Хенкок.

Крис Филипс е наградуван радиоводител кој веќе 40 години споделува џез и друга музика на лондонското радио. Крис бил еден од првите диџеи на „К-Џез“ (K-Jazz), првата специјализирана џез-радиостаница во Велика Британија. Во средината на 1980-тите, оваа пиратска станица во неделите емитувала програма токму од неговата гаража во јужен Лондон. На „К-Џез“ работеле истакнати имиња како Жил Питерсон, Џез Нелсон, Боб Џонс и Кевин Бидл. Во 1990 година, Крис се приклучил на „Џез ФМ 102.2“, каде што водел попладневна програма во работните денови, пред да стане ководител на ценетата доцновечерна емисија „Somethin’ Else“ заедно со Џез Нелсон. По заминувањето од „Џез ФМ“, тие ја пренеле емисијата на радиото „Кис 100 ФМ“ (Kiss 100 FM), а истовремено ја коосновале независната продукциска компанија со истото име. По петнаесет години во етерот на „Кис 100 ФМ“, Крис имал ангажмани на „Чојс ФМ“ (Choice FM) и „Ди Џез“ (The Jazz), станици кои денес повеќе не постојат. Во 2009 година, тој се приклучил на новообновеното „Џез ФМ“ радио. Неговиот ентузијазам за споделување нова музика е неограничен, а денес е коосновач на „Уан Џез“ (One Jazz).